Mikil gróska í menningu Eyjamanna á fastalandinu þessa dagana, má þar helst nefna:

Stella Guðmundsdóttir, myndlistarkona við eina af vatnslitamyndum sínum. 

92 ára Eyjakona heldur sína fyrstu málverkasýningu.

Stella Guðmundsdóttir, heldur sína fyrstu einkasýningu 92 ára að aldri. Stella sem fæddist í Vestmannaeyjum 1923 hóf ekki að mála fyrr en hún varð 77 ára. Sýningin er í matsal hjúkrunarheimilisins Sunnuhlíðar, þar sem hún dvelur og er opin virka daga frá kl. 8:00 til 16:00.
Sýningin er öllum opin en henni lýkur 1. maí n.k.

Hér má lesa viðtal við Stellu á vefnum kopavogsbladid.is af þessu tilefni.

Bjartmar á Björtum dögum í Hafnarfirði.

Bjartmar Guðlaugsson verður með málverkasýningu og tónleika á BJÖRTUM DÖGUM í Hafnarfirði.
Sýningin sem nefnist "Hljómsveit hússins" opnar kl. 15:00 á sumardaginn fyrsta, 23. apríl og stendur til sunnudagsins 26. apríl. Sýnt er í andyri Bæjarbíós við Strandgötu. Opið verður frá 13:00-17:00, aðgangur ókeypis.
Á föstudagskvöldið 24. apríl kl. 21:00 heldur Bjartmar tónleika á sama stað, forsala miða er í Bæjarbíói og við innganginn.

Eyjakonur með samsýningu.

Á laugardaginn 25. apríl, kl. 14:00 opna málverkasýningu Eyjakonurnar  Jóhanna Hermansen og Ósk Laufdal í Café Mezzo, Iðuhúsinu við Lækjargötu 2a. Sýningin stendur til  31. maí. Allir eru velkomnir.

Eyjakvöld undir Eyjafjöllum laugardaginn 9. maí

Blítt og Létt hópurinn sem er kunnur fyrir sínar einstöku söngskemmtanir verður með Eyjakvöld í Gamla fjósinu undir Eyjafjöllunum laugardaginn 9. maí. Að venju verður textum varpað á tjald þannig að allir geti sungið með. Gleðin hefst kl. 22:00 - Verð á söngvakvöldið er kr. 2000.-
Borðapantanir fyrir matargesti í síma 487-7788

Lokakaffi Heimaeyjar 10. maí.

Kvenfélagið Heimaey heldur sitt árlega "Lokakaffi" sunnudaginn 10. maí, frá kl 14:00-17:00 á Grand Hótel, Sigtúni 38. Kaffið hefur ævinlega verið vel sótt og margur Eyjamaðurinn haft þann árlega sið að mæta, hitta gamla félaga, spjalla og eiga ánægjulega dagstund yfir glæsilegu kaffiborði. Ekki er verra að allur ágóði kaffisölunar rennur til líknarstarfa félagskvenna.

Þær þráðinn spunnu.

Innan skamms gefur Gunnhildur Hrólfsdóttir, sagnfræðingur og rithöfundur út bók sína; Þær þráðinn spunnu. Sýnishorn af sögu kvenna í Vestmannaeyjum frá 1835 til 1980. Bókin er um 460 blaðsíður, myndskreytt og prentuð á vandaðan pappír með harðspjaldakápu og gylltri áletrun. Til 10. maí er hægt að skrá sig fyrir sérstöku eintaki af bókinni. 

Lesa má nánar um bókina hér.

.

Þær þráðinn spunnu - Tilboð

Á aðalfundi ÁtVR 22. mars hélt Gunnhildur Hrólfsdóttir ákaflega áhugavert erindi; Þær þráðinn spunnu - Konur í Vestmannaeyjum 1835 - 1980.  
Vakti erindið almenna hrifningu fundargesta enda bæði fróðlegt og skemmtilegt. Margir lýstu áhuga sínum að eignast bókina þegar hún kæmi út. Nú gefst tækifærið því Gunnhildur býður félagsmönnum og öðrum er áhuga hafa að kaupa bókina í forsölu.

Kæru félagar í ÁtVR og aðrir Vestmannaeyingar.
Nú styttist í útgáfu bókar minnar Þær þráðinn spunnu sem er sýnishorn af sögu kvenna í Vestmannaeyjum frá 1835 til 1980. Bókin er myndskreytt, um 460 blaðsíður, prentuð á vandaðan pappír með harðspjaldakápu og gylltri áletrun.

Býð ég áhugasömum að skrá sig fyrir bók. Verð til áskrifenda verðu kr. 8.900 og þeir sem skrá sig fyrir 10. maí 2015 fá nafn sitt á heiðurslista í bókinni. Bókin verður send áskrifendum og innheimt í heimabanka.

Þar sem útgáfan er mjög kostnaðarsöm yrði það mér mikill styrkur að fá sem flesta til að gerast áskrifendur og tryggja þannig grundvöll útgáfunnar.

Þeir sem óska eftir að gerast áskrifendur sendi tölvupóst á netfangið:

[email protected]

Kær kveðja til ykkar allra

Gunnhildur Hrólfsdóttir 

.